पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
संवाददाता:- प्रशान्त महासागर
"स्वास्थ्य सेवा कृपा होइन, राज्यको कर्तव्य र नागरिकको अधिकार हो ।”
कीर्तिपुर अस्पतालमा गत हप्ता डाइलसिस गराउन पर्खाईमा रहेका बिरामी संख्या १४ थियो भने यो हप्ता १९ जना अर्थात थप ५ जना बिरामीले आफ्नो अस्तित्व जोगाउन युद्ध गरिरहेका छन । यो समस्या यसरी नै बढ्दै जाने हो भने यसको स्वरुप कस्तो हुन्छ सम्पुर्ण कीर्तिपुरबासीले सोच्ने दिन आएको छ । थप १० वटा मेसिनको राम्रो व्यवस्थापन गर्न सके कीर्तिपुरबासी लगायत क्षेत्र नं.१० कै लागि ती सुबिधा दिन सक्ने हुनेछौँ । यसको लागि मेयर तथा वडाध्यक्षहरु व्यक्ति होइन कीर्तिपुरको जिम्मेवारी हो बुझ्न ढिलो भएको छ ।
मानिसले जीवनमा धेरै कुरा गुमाउन सक्छ — धन, पद, अवसर, समय । तर जब स्वास्थ्य गुम्छ, तब उसले आफूलाई नै हराएको महसुस गर्छ । विशेषगरी मृगौला रोगजस्तो दीर्घ र पीडादायी रोगसँग संघर्ष गरिरहेका नागरिकका लागि प्रत्येक दिन केवल उपचारको खोज होइन, अस्तित्व जोगाउने युद्ध हो ।
हुन त कीर्तिपुर केवल सडक, भवन र योजनाले बनेको सहर मात्र होइन । यो त मानिसहरूको सपना, पीडा, आँसु र आशाले बनेको जीवित समाज हो । त्यसैले यहाँको प्रत्येक बिरामी नागरिकको जीवनप्रति नगरको उत्तरदायित्व हुन्छ ।
नगरप्रमुखको कुर्सी केवल प्रशासनिक पद होइन, त्यो जनताको विश्वास, जीवन र सुरक्षाको प्रतिज्ञा हो । जब कुनै मृगौला रोगी उपचारको अभावमा छट्पटाइरहेको हुन्छ, जब परिवारले घर बेचेर डायलाइसिस गराइरहेको हुन्छ, जब आमाबुबाले आफ्ना सन्तान बचाउन ऋणको भारी बोकिरहेका हुन्छन, त्यो बेला राज्य मौन बस्नु केवल कमजोरी होइन, मानवीय संवेदनाको हार हो ।
एक सभ्य समाजको पहिचान उसले कति अग्ला भवन बनायो भन्ने होइन, उसले कति कमजोर नागरिकलाई बचायो भन्ने हो । कीर्तिपुरमा यदि मृगौला रोगीहरूले आफ्नो उपचारका लागि बारम्बार हारगुहार गर्नुपर्छ भने, त्यो केवल स्वास्थ्य समस्या होइन; त्यो राजनीतिक संवेदनहीनताको संकेत हो । जनताको स्वास्थ्यप्रति पन्छिन खोज्नु नेतृत्वको कमी मात्र होइन, पदको नैतिक जिम्मेवारीबाट भाग्नु हो ।
नेतृत्वको वास्तविक परीक्षा चुनावको भाषणमा हुँदैन, अस्पतालको बेडमा पीडाले कराइरहेका नागरिकको छेउमा उभिने साहसमा हुन्छ । आज आवश्यकता केवल योजनाको होइन, मानवीय हृदय भएको निर्णयको हो । कीर्तिपुरले विकाससँगै दयाभाव, उत्तरदायित्व र स्वास्थ्य सुरक्षाको उदाहरण पनि दिनुपर्छ । किनकि उपचार पाउने अधिकार कुनै सुविधा होइन, प्रत्येक नागरिकको जन्मसिद्ध अधिकार हो ।
“जनताको पीडामा मौन बस्ने सत्ता, अन्ततः आफ्नै अस्तित्वबाट टाढिन्छ ।” याद राख्नुस् । अत: सबै वडाका जनप्रतिनिधिहरु लगायत नगरप्रमुखको पहिलो कर्तव्य दायित्व जे भनिए तापनी आम कीर्तिपुरबासीको स्वास्थ्यमा प्रत्यक्षमा जोड्न हुन अनुरोध छ ।
“अस्पतालको बेडमा छट्पटाइरहेको नागरिकलाई राजनीति होइन, जीवन चाहिएको हुन्छ ।”
उपचार नपाएर बग्ने आँसु, कुनै पनि विकासको भाषणभन्दा भारी हुन्छ । त्यसैले नेतृत्वको उचाइ भाषणले होइन, कमजोर नागरिकलाई कति समेट्छ भन्नेले कुराले नाप्नुपर्छ । “स्वास्थ्य सेवा कृपा होइन, राज्यको कर्तव्य र नागरिकको अधिकार हो ।” अत: कीर्तिपुरको आत्मा जोगाउने हो भने सबैभन्दा पहिले यहाँका नागरिकको स्वास्थ्य जोगाउनुपर्छ किनकि सहरको वास्तविक शक्ति सडकमा होइन, स्वस्थ र सम्मानित नागरिकमा हुन्छ ।
याद होस् : “मृगौला रोगीसँग समय कम हुन्छ, त्यसैले सरकारको संवेदनशीलता ढिलो हुनु हुँदैन ।”
