पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
संवाददाता:- प्रशान्त महासागर
जनगुनासो
कीर्तिपुरस्थित बाघ भैरब मन्दिर परिसरमा अनावश्यक भौतिक निर्माणका कारण सम्पदामाथि जोखिम बढ्दै गएको भन्दै गम्भीर ध्यानाकर्षण भएको छ। विशेषगरी स्नान गर्न जाने परम्परागत बाटो काटेर, गोरेटो बाटो समेत नभएको स्थानमा मोटर बाटो निर्माण गर्ने कार्यप्रति स्थानीय समुदायले कडा आपत्ति जनाएका छन्।
यस विषयमा बाघ भैरब गुठी ले सम्बन्धित निकायसमक्ष ज्ञापन पत्र बुझाउँदै, सांस्कृतिक तथा धार्मिक सम्पदाको संरक्षणमा गम्भीरता अपनाउन आग्रह गरेको छ। गुठीका अनुसार, यस्तो निर्माण कार्यले न केवल ऐतिहासिक स्वरूपमा क्षति पुर्याउनेछ, बल्कि स्थानीय धार्मिक परम्परा र सांस्कृतिक पहिचानलाई समेत कमजोर बनाउने खतरा रहेको छ।
सत्ताको आडमा सम्पदामाथि खेलवाड हुने प्रवृत्ति कीर्तिपुर क्षेत्रमा बढ्दो देखिएको भन्दै गुठीले चिन्ता व्यक्त गरेको छ। “विकास” का नाममा गरिने अनियन्त्रित संरचना निर्माणले दीर्घकालीन रूपमा अमूल्य सम्पदाको अस्तित्व नै संकटमा पार्न सक्ने 
भएकाले, यस्ता कार्य तुरुन्त रोक्नुपर्ने माग गरिएको छ।
ज्ञापन पत्रमार्फत सम्बन्धित निकायलाई उक्त मोटर बाटो निर्माण कार्य तत्काल स्थगन गर्न, यसको आवश्यक छानबिन गर्न तथा दोषीमाथि कानुनी कारबाही अगाडि बढाउन जोडदार माग गरिएको छ। साथै, भविष्यमा यस्ता गतिविधि दोहोरिन नदिन स्पष्ट नीतिगत व्यवस्था र कडाइका साथ कार्यान्वयन गर्न पनि आग्रह गरिएको छ।
स्थानीयवासी र सरोकारवालाहरूले सम्पदा संरक्षणलाई प्राथमिकता दिँदै, परम्परागत संरचना र बाटोहरूको मौलिकता जोगाउनु नै दीर्घकालीन विकासको आधार हुने धारणा राखेका छन्।
