पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
सन्चारकर्मी सुर्य राय
रिपोर्टर : आमा दर्शन न्यूज, चितवन | ४ वैशाख, २०८१
चितवनको गोन्द्राङदेखि पुलचोकसम्म फैलिएको ६ किलोमिटर लामो र ५० मिटर चौडाइको सडक अहिले राजनीतिक 'हट स्पट' बनेको छ। पूर्व–पश्चिम राजमार्गअन्तर्गतको यो सडक प्रधानमन्त्री केपी शर्मा ओलीको उद्घाटन प्रतीक्षामा छ, तर यसअघि नै श्रेयको रस्साकस्सी सुरु भइसकेको छ।
सडक सुन्दर छ। ६ लेनको कालोपत्रे बाटो, बीचमा हरियाली, दुबो र फूलले सजिएको मेडियन, दुवैतर्फ सर्भिस लेन, अन्डरग्राउन्ड बिजुली लाइन, स्मार्ट लाइट र फुटपाथ। साँच्चिकै 'स्मार्ट सडक' भनेर चिनाउन मिल्ने भौतिक संरचना बनेको छ। तर यो सडकको जस कसले लिने?—यो प्रश्न अहिले सबैभन्दा चर्चाको विषय बनेको छ।
एकातिर माओवादी केन्द्रका नेता कार्यकर्ताले सडक महानगर प्रमुख रेनु दाहालको सक्रियता र पहलमा निर्माण भएको दाबी गरिरहेका छन्। अर्कोतर्फ, नेकपा एमालेले यो योजना प्रधानमन्त्री ओलीको अघिल्लो कार्यकालमै सुरु गरिएको, केन्द्रीय सरकारको प्राथमिकता योजनामा परेको सडक भएको बताउँदै पूर्ण श्रेय आफूहरूलाई जानुपर्ने बताइरहेका छन्।
यता मेयर रेनु दाहाल भने दोधारमा छिन्। २०७७ माघ १७ मा शिलान्यासका बेला ओलीलाई खुलेआम बहिष्कार गरेकी दाहाल अब सोही व्यक्तिको हातबाट उद्घाटन हुने कार्यक्रममा जान— कि नगइ— भन्ने द्विविधामा परेकी हुन्।
आमा दर्शन न्यूजका रिपोर्टर बिहानै सडक क्षेत्रमा पुग्दा देखिन्छ— सडक भव्य बनेको छ, काम लगभग सम्पन्न भइसकेको छ। तर, सडकको किनारमा राजनीति पनि त्यत्तिकै गहिरो बनेको छ। एक स्थानीय व्यापारीले भने, “सडक राम्रो बन्यो, अब जस जो लिओस्, हामीलाई त बाटो चाँडो खुल्यो भने पुग्यो।”
तर राजनीतिमा त्यस्तो हुँदैन। जस लिन, सन्देश दिन, शक्तिको छाप देखाउन पार्टीहरू कुनै कसर बाँकी राख्न चाहँदैनन्। यही कारण आज यो सडक पूर्वाधार विकासको नमुना मात्रै नभई—राजनीतिक सन्देशको प्लेटफर्म पनि बनेको छ।
हामीले बुझ्दा उद्घाटन समारोहमा मेयर दाहाललाई निमन्त्रणा पठाइसकिएको छ। अब हेर्न बाँकी छ, उनी कार्यक्रममा सहभागी हुन्छिन् कि हुँदैनन्। तर एक कुरा स्पष्ट छ—सडकले गन्तव्य मात्र जोड्दैन, राजनीतिक मोडहरू पनि देखाउँछ।
रिपोर्टिङ : आमा दर्शन न्यूज, चितवन
