काठमाडौंमा हर्क सम्पाङको आमसभा: गीत–संगीतसहित नेतृत्वहीनताको आलोचना

काठमाडौं, सिफलचौर — धरानका मेयर तथा श्रम संस्कृति पार्टीका नेता हर्कराज “हर्क” सम्पाङले काठमाडौंमा आयोजना गरिएको आमसभामा आफूलाई बिल्कुलै अनौपचारिक शैलीमा प्रस्तुत गरे। कन्सर्टमा प्रस्तुति दिने कलाकारजस्तै शैली लिएर उनले भाषण सुरु गरे— “खुसी लाग्यो, सन्चै हुनुहुँदो रहेछ। दुई–चार मिनेट लिन्छु, हुन्छ?”

सभामा राम्रै भीड भएको थियो। राजधानीमा पनि आफ्नो लोकप्रियता कायम रहेको संकेतजस्तै साम्पाङ प्रवेश गर्दा ठूलो हुटिङ सुनिएको थियो।

गीत गाएर दर्शक ताने

सम्पाङले भाषण सुरु गर्दै नै उपस्थित सबैलाई ‘आमाबुबा, दाजुभाइ, दिदीबहिनी, जेनेरेसन–जेड भाइबहिनी’ भनेर सम्बोधन गरे। त्यसपछि उनले दर्शकसँगै गीत गाउने प्रस्ताव राखे।

उनले भाका मिलाउँदै गाएको पहिलो गीत यस्तो थियो—

“ढुंगा छुन्दा मेरो देश सम्झिरहन्छु सधैँ…

जय जय प्रकृति, जय जय संस्कृति…”

गीतपछि उनले राजनीतिक प्रसंगतिर मोडिए।

“देश नेतृत्वहीन छ, नागरिक सुरक्षित छैन”

देश वर्तमान अवस्थामा नेतृत्वविहीन बनेको आरोप उनले लगाए।

“सरकार छ कि छैन थाहा छैन। नागरिकको ज्यान–धन सुरक्षित छैन। दिनदहाडै लुटिन्छौँ,” सम्पाङले भने।

उनले विगतका नेतामा भिजनको अभाव रहेको दाबी गर्दै थपे—

“हामीले चुनिरहेका नेताले देशको अर्थतन्त्र उठाउने कुनै दृष्टिकोण देखाएनन्। विदेशी प्रभुलाई ढोग्ने र ऋण–अनुदानले आफ्नो धन जम्मा गर्ने नेताबाट देश चल्दैन।”

‘भदौ २३–२४’ घटनाको प्रसंग

उनका अनुसार जनताको भावना संवोधन गर्न नसक्दा राजनीतिक अस्थिरता बढेको छ।

“यी नेताले सिंहदरबार, संसद भवन, सर्वोच्च अदालतसमेत जोगाउन सकेनन्। जनताको भावना बुझेको भए भदौ २३–२४ जस्ता घटना आइरहँदैन थे,” उनले टिप्पणी गरे।

‘श्रम संस्कृति पार्टी नै अन्तिम विकल्प’

देशलाई निकास दिने शक्ति अब श्रम संस्कृति पार्टीमै रहेको उनले दाबी गरे।

“हामीसँग भिजन छ। श्रम संस्कृतिले मात्रै देशका समस्या समाधान गर्न सक्छ,” सम्पाङले भने।

उनका अनुसार श्रम संस्कृतिको मूल अर्थ— “मान्छेलाई विकासको केन्द्रमा राख्ने, काम नगर्ने परम्परा तोड्ने” हो।

‘हामी चुनाव जितेर सरकार बनाउँछौँ’

सम्पाङले आगामी चुनावमा आफ्नो पार्टीको सरकार बन्नेमा विश्वस्त रहेको बताए।

“यसमा कुनै शंका छैन। सरकार गठन गर्ने हो। त्यसपछि जेनजी आयोग बनाउने हो,” उनले भने।

उनले जेनरेशन–जेड आन्दोलनले राज्य संरचनाबारे उठाएका प्रश्नलाई समझिने प्रतिवद्धता जनाए।

दोस्रो गीतसँगै सभा समेटियो

भाषण लम्बिँदै जाँदा भीड थाक्दै गएको देखेपछि उनले ‘राष्ट्रप्रेमी ब्रेक’ भन्दै फेरि गीत गाए—

“धुलो होइन यो, मेरो देशको माटो हो…

ढाँटि हिँड्ने राजनीतिको अन्त्य होस्,

कर्म गर्ने संस्कृतिको सुरुवात होस्…”