पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
आमा दर्शन न्युज :- संवाददाता
हाल श्रम बजारमा सिपयुक्त जनशक्तिको माग र आपूर्तिबीच ठूलो खाडल कायमै छ। काठमाडौं महानगरपालिकाले यो समस्याको समाधानलाई उच्च प्राथमिकता दिँदै मेलाका अतिरिक्त नियमित तालिम पनि प्रदान गर्दै आएको यहाँहरूलाई अवगत नै छ।
आर्थिक वर्ष २०८०/८१ देखि कार्यान्वयनमा आएको महानगरको गौरव योजना ‘रोजगारी र आय वृद्धि, काठमाडौंको समृद्धि’ कार्यक्रमअन्तर्गत १५ हजार युवालाई सिपमूलक तालिम दिई कम्तीमा ५ हजार जनालाई रोजगार तथा स्वरोजगारमा संलग्न गराउने लक्ष्य राखिएको छ। सिप नजान्नेहरूलाई सिप सिकाउने, आधारभूत तालिम लिएका व्यक्तिहरूलाई स्तरोन्नति गराउने र बजारमा सिपयुक्त जनशक्ति उपलब्ध गराउने उद्देश्य मेलाको मूल उद्देश्य हो।
गत वर्ष श्रमिक दिवस २०८१ का दिनदेखि टुंडिखेलमा पहिलो पटक ‘सिप मेला’ आयोजना गरिएको थियो। उक्त मेलाबाट तालिम लिन ६८ हजार ८६६ जनाले आवेदन दिएका थिए। त्यस मेलाबाट विभिन्न विधामा २ हजार ८१ जना युवालाई तालिम दिने लक्ष्य थियो भने २ हजार ५७५ जनालाई तालिम प्रदान गरिएको थियो। तीमध्ये ५० प्रतिशतभन्दा बढीले रोजगारीको अवसर प्राप्त गरेका छन् भने धेरैजसो स्वरोजगारमा संलग्न भएका छन्। रोजगारी तथा स्वरोजगारको अवसरबाट बाहिर रहेका व्यक्तिहरूका लागि महानगरपालिकाले उद्योग तथा कम्पनीहरूसँग सहकार्य गरेर ‘अन द जब ट्रेनिङ’ समेत गराइरहेको जानकारी गराउन चाहन्छौँ।
विगत सिप मेलाबाट प्राप्त सिकाइ तथा नियमित तालिमको अनुभवका आधारमा यस वर्ष पनि ‘सिप मेला’ कार्यक्रमलाई निरन्तरता दिइएकोमा हामी हर्षित छौँ।
महानगरपालिकाले आउँदो जेठ ७ गतेदेखि टुंडिखेलमा सुरु हुने मेलामा २०८२ जनालाई रोजगारीमूलक तालिम तथा रोजगारीको अवसर प्रदान गर्ने लक्ष्य लिएको छ।
यस वर्षको सिप मेलामा गत वर्ष फारम भरेर तालिम लिन नपाएका व्यक्ति, काठमाडौं महानगरमा स्थायी वा अस्थायी रूपमा बसोबास गरिरहेका नागरिक, स्यानिटरी ल्याण्डफिल साइट प्रभावित क्षेत्रका वासिन्दा, फरक क्षमता भएका व्यक्ति, सडक व्यापार वा ठेलागाडामा व्यापार गरेका व्यक्तिहरूलाई प्राथमिकता दिइनेछ। तालिममा सबै नेपाली नागरिकले सहभागिता जनाउन पाउनेछन्।
रोजगारीका प्रशस्त सम्भावना आन्तरिक बजारमै रहेको देखाउँदै, सिप नहुनाले अनौपचारिक क्षेत्रको अर्थतन्त्रमा रहेको जनशक्तिलाई औपचारिक क्षेत्रमा रूपान्तरण गर्नु तालिमको मुख्य उद्देश्य हो। ‘शिक्षालाई सिपसँग’, ‘सिपलाई श्रमसँग’ र ‘श्रमलाई उत्पादनसँग’ जोड्ने लक्ष्यसहित तालिम सञ्चालन गरिनेछ। सिप नभएका व्यक्तिलाई सिपयुक्त बनाउने, सिप भएकालाई रोजगारी र स्वरोजगारमा लगाउने, र रोजगारीमा रहेर पनि सिप नपुगेकाहरूको व्यावसायिक स्तर वृद्धि गरेर आयमा बृद्धि गराउने कार्य यस कार्यक्रमअन्तर्गत गरिनेछ।
१८ वर्षदेखि ५८ वर्ष उमेर समूहका व्यक्तिहरूले तालिममा सहभागी हुन सक्नेछन्। मेला ३० दिनसम्म चल्नेछ, जसमा दैनिक ६० वटा कक्षामा तालिम सञ्चालन गरिनेछ।
तालिम सम्पन्न भएपछि दुई दिने ‘पोस्ट मेला’ आयोजना गरिनेछ, जसमा दीक्षान्त समारोह, प्रमाणपत्र वितरण तथा तालिम प्राप्त व्यक्तिहरूलाई उद्योगहरूसँग जोड्ने विभिन्न कार्यक्रमहरू सञ्चालन गरिनेछन्।
