पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
आमा दर्शन न्युज :- संवाददाता
नेपालमा आगामी मनसुनमा औसतभन्दा बढी वर्षाको सम्भावना
काठमाडौं, जेठ १६ ।मौसम पूर्वानुमान महाशाखाले आगामी मनसुनमा नेपालका अधिकांश भू–भागमा औसतभन्दा बढी वर्षा हुने प्रक्षेपण गरेको छ । विभागले आज सार्वजनिक गरेको चार महिनाको मनसुन अवधि (जेठ १८ देखि असोज १४ सम्म) को वर्षा पूर्वानुमान अनुसार, देशका धेरै स्थानमा सरदरभन्दा बढी वर्षा हुने सम्भावना देखिएको हो ।
महाशाखाका वरिष्ठ मौसमविद् शान्ति कुमारी जोशीका अनुसार, “यस वर्ष कर्णाली प्रदेशको पूर्वी भू–भाग, लुम्बिनी प्रदेशको उत्तरी भू–भाग र गण्डकी प्रदेशको अधिकांश भू–भागमा सरदरभन्दा बढी वर्षा हुने सम्भावना ५५ देखि ६५ प्रतिशत रहेको छ ।”
त्यस्तै, सुदूरपश्चिम प्रदेशको दक्षिणी भू–भाग, लुम्बिनी प्रदेशको पश्चिमी भू–भाग, गण्डकी प्रदेशको उत्तर–पूर्वी भू–भाग, बागमती र कोशी प्रदेशको उत्तरी भू–भागमा औसतभन्दा बढी वर्षा हुने सम्भावना ४५ देखि ५५ प्रतिशत रहेको उनले बताए ।
मधेस प्रदेशका पूर्वी तथा दक्षिणी भू–भागमा भने औसत वर्षाको सम्भावना ३५ देखि ४५ प्रतिशत मात्र रहेको बताइएको छ । बाँकी भू–भागमा पनि औसतभन्दा बढी वर्षाको सम्भावना ३५ देखि ४५ प्रतिशत रहेको विभागले जनाएको छ ।
यद्यपि, देशका अन्य भू–आगहरूमा मनसुनको प्रभाव विस्तार हुन अझै केही दिन लाग्ने बताइएको छ । हालसम्म देशका बाँकी भू–भागमा पश्चिमी वायू र स्थानीय वायूको प्रभाव यथावत रहेको जोशीले जानकारी दिइन् ।
महाशाखाले मौसमको अवस्थाको निरन्तर अनुगमन गरिरहेको र नियमित रूपमा अद्यावधिक गर्दै जाने बताइएको छ ।
