पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
त्रिभुवन अन्तर्राष्ट्रिय विमानस्थल (TIA) मंगलबारदेखि अनिश्चितकालका लागि बन्द गरिएको छ। विमानस्थल कार्यालयले मंगलबार एक विज्ञप्ति जारी गर्दै विषम परिस्थिति उत्पन्न भएका कारण तत्कालका लागि सम्पूर्ण उडानहरू स्थगित गरिएको जानकारी दिएको हो।
विज्ञप्तिमा भनिएको छ, “विशेष कारणवश विमानस्थल आजदेखि अर्को सूचना जारी नभएसम्मका लागि बन्द रहने जानकारी गराइन्छ।” यद्यपि, ‘विशेष कारण’ भन्ने उल्लेख भए पनि त्यसको विस्तृत विवरण भने सार्वजनिक गरिएको छैन।
विमानस्थलको आकस्मिक बन्दले आन्तरिक तथा अन्तर्राष्ट्रिय यात्रुहरूमा ठूलो अन्योलको स्थिति उत्पन्न भएको छ। यात्रुहरू टिकट र बुकिङका विषयमा जानकारी पाउनका लागि एयरलाइन्स र ट्राभल एजेन्सीहरूमा सम्पर्क गरिरहेकाले अधिकांश सेवा प्रदायक कार्यालयहरूमा चाप बढेको देखिएको छ।
सञ्चारकर्मीहरूसँग संक्षिप्त कुराकानीमा विमानस्थल स्रोतले प्राविधिक समस्याको आशंका गरिएको जनाए पनि पुष्टि गर्न मानेन। सुरक्षा निकायहरू भने विमानस्थल परिसरमा सक्रिय देखिएका छन्।
यसबीच, पर्यटन तथा नागरिक उड्डयन मन्त्रालयले विमानस्थलको अवस्थाबारे अध्ययन भइरहेको र चाँडै यथार्थ विवरण सार्वजनिक गरिने जनाएको छ।
यात्रुहरूलाई अनावश्यक भ्रमण नगर्न र आधिकारिक सूचनाका लागि विमानस्थलको वेबसाइट वा सम्बन्धित एयरलाइन्सहरूको सम्पर्क नम्बरमार्फत जानकारी लिन आग्रह गरिएको छ।
