पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
आमा दर्शन न्युज :- संवाददाता
काठमाडौँ । शुक्रबार खराब मौसम र कम भिजिबिलिटीका कारण देशभरका विभिन्न उडानहरू प्रभावित भएका छन्। त्रिभुवन अन्तर्राष्ट्रिय विमानस्थलले दिएको जानकारी अनुसार, माउन्टेन फ्लाइटसहित विभिन्न गन्तव्यका उडानहरू रद्द भएका छन् भने केही उडानहरू ढिलो भएका छन्।
पश्चिमी क्षेत्रका धनगढी, नेपालगञ्ज, र भैरहवा तथा पूर्वी क्षेत्रका सिमरा र जनकपुरतर्फका उडानहरू सञ्चालनमा छन्। तर, भद्रपुर, पोखरा, भरतपुर, विराटनगर, तुम्लिङटार, र सुर्खेतका विमानस्थलहरूमा मौसम सुधार नहुँदासम्म उडानहरू सुचारु हुन नसक्ने जनाइएको छ।
माउन्टेन फ्लाइट पूर्ण रूपमा रद्द भएको छ भने यती, बुद्ध, र सिम्रिक एयरलाइन्सले सहरी गन्तव्यहरूमा उडान गरिरहेका छन्। दुर्गम क्षेत्रका लागि तारा र समिट एयरलाइन्सले उडान गरिरहेका भए पनि ती उडानहरू ढिलो भइरहेको जानकारी विमानस्थल कार्यालयले दिएको छ।
खराब मौसमका कारण यात्रुहरूमा थप चाप देखिएको छ र उडान समय तालिकामा अवरोध आएको छ। मौसममा सुधार भएपछि मात्रै नियमित उडानहरू सञ्चालनमा आउने अपेक्षा गरिएको छ।
