पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
आमा दर्शन न्युज :- संवाददाता
काभ्रेपलाञ्चोक — काभ्रेपलाञ्चोकको बनेपा नगरपालिका–४ र १ को सीमास्थित नाला–च्यामासिङ सडकखण्ड अन्तर्गत रहेको पुरानो पुल शुक्रबार राति भाँचिएपछि काठमाडौं आवतजावतका लागि प्रयोग हुने वैकल्पिक मार्ग पूर्ण रूपमा अवरुद्ध भएको छ।
स्थानीय शान्तलाल श्रेष्ठका अनुसार शनिबार बिहान सबेरै एक मालबाहक गाडी पुल पार गरेलगत्तै पुल भाँचिएको हो। २०३७ सालमा निर्माण गरिएको उक्त पुल भाँचिएसँगै पूर्वबाट काठमाडौं भित्रिने र काठमाडौंबाट मध्यपूर्वतर्फ बाहिरिने सवारी आवागमन रोकिएको छ।
अहिले अरनिको राजमार्गको सूर्यविनायकदेखि धुलिखेलसम्म सडक विस्तार भइरहेकाले विगत दुई वर्षदेखि नाला–च्यामासिङ सडकलाई वैकल्पिक मार्गका रूपमा प्रयोग हुँदै आएको थियो। पुल भाँचिएपछि उक्त वैकल्पिक मार्ग समेत बन्द हुँदा यात्रु तथा चालकहरू मारमा परेका छन्।
जिल्ला ट्राफिक प्रहरी कार्यालय, बनेपाले भक्तपुरतर्फबाट आउने सवारीलाई उक्त सडकमा नपठाउन आग्रह गरेको छ भने बनेपाबाट काठमाडौंतर्फ जाने सवारी साधनलाई बनेपामै रोकिएको जनाएको छ।
पुल मर्मत नभएसम्म वैकल्पिक मार्ग पूर्ण रूपमा बन्द रहने भएकाले यात्रु तथा मालवाहक सवारीलाई वैकल्पिक योजना बनाउन ट्राफिक कार्यालयले आग्रह गरेको छ।
मुख्य बुँदाहरू:
•भाँचिएको पुल २०३७ सालमा निर्माण गरिएको थियो।
•वैकल्पिक मार्ग अवरुद्ध हुँदा पूर्व–काठमाडौं सवारी आवागमन रोकिएको छ।
•अरनिको राजमार्गमा निर्माण कार्य जारी रहेकोले समस्या झनै जटिल बनेको छ।
•यात्रु तथा चालकहरू वैकल्पिक मार्गको खोजीमा।
अहिले सडक खुलाउनका लागि सम्बन्धित निकायले आवश्यक प्राविधिक परीक्षण र मर्मत कार्य अघि बढाउने तयारी गरिरहेको जनाइएको छ।
