मन्त्री पुनको निर्देशन: पाठ्यपुस्तकमा नैतिक, व्यवहारिक शिक्षा र संविधान ज्ञानलाई प्राथमिकता

काठमाडौं । शिक्षा, विज्ञान तथा प्रविधिमन्त्री महावीर पुनले विद्यालयका पाठ्यपुस्तकमा नैतिक शिक्षा, व्यवहारिक शिक्षा, इतिहास र संविधानसम्बन्धी ज्ञानलाई उच्च प्राथमिकता दिन सम्बन्धित निकायलाई निर्देशन दिनुभएको छ।

मन्त्री पुनका अनुसार शिक्षाको मुख्य उद्देश्य केवल परीक्षा उतीर्ण गर्नका लागि ज्ञान प्रदान गर्नु मात्र नभई सदाचार, व्यवहारिकता र नागरिक उत्तरदायित्वबोध गराउने शिक्षा प्रणाली विकास गर्नु हो।

उहाँले विद्यालय स्तरमै विद्यार्थीमा देशप्रेम, ईमानदारी, सामाजिक उत्तरदायित्व र संविधानबारे बोध गराउने विषयहरू समावेश गर्नुपर्ने आवश्यकता औंल्याउनुभयो।

अहिले विभिन्न संस्था–संगठनहरूले ‘Moral Education’ को नारासहित विद्यार्थी र समुदायमा सचेतना फैलाउने प्रयास गर्दै आएका छन्। तर, २०० भन्दा बढी विदेशी नेतृत्व भएका NGO/INGO, केही धार्मिक संस्था र नेपाली स्थानीय क्लबहरूले Moral Education को नाममा विद्यार्थीलाई पढाएर आर्थिक लाभ उठाउने अनैतिक अभ्यास गरिरहेका छन्। उहाँले यसप्रकारको कार्य रोक्न कडा निर्देशन दिनुभएको छ र अब व्यावसायिक उद्देश्यका लागि Moral Education बाट पैसा उठाउने काम बन्द हुने भएको छ।

मन्त्री पुनले हाल शिक्षामा भइरहेको सुधार प्रयासहरूलाई थप प्रभावकारी बनाउन सबै सरोकारवालाको सहयोग आवश्यक रहेको पनि बताउनुभयो।