पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
आमा दर्शन न्युज :- संवाददाता
काठमाडौँ, ११ नोभेम्बर – राष्ट्रिय स्वतन्त्र पार्टीका शीर्ष नेताहरूले आज जिल्ला प्रहरी कार्यालय कास्कीको हिरासतमा रहेका पार्टी सभापति रवि लामिछानेलाई भेट गरेका छन्। भेटमा उपसभापति स्वर्णिम वाग्ले, डीपी अर्याल र प्रवक्ता मनिष झाले सहभागिता जनाएका थिए।
भेटपछि, प्रवक्ता मनिष झाले संवाददाताहरूसँग कुराकानी गर्दै भने, "हामी सभापति लामिछानेसँग भएका छलफलको विषयमा पार्टीभित्र थप छलफल गर्नेछौं र पर्सि पत्रकार सम्मेलनमा सबैलाई विस्तृत जानकारी दिनेछौं। यस पत्रकार सम्मेलनमा हामी राज्यसत्ताले गरेको प्रतिशोध र आगामी कदमबारे कुरा गर्नेछौं।"
प्रवक्ताले पत्रकार सम्मेलन पर्सि अपरान्ह केन्द्रीय कार्यालयमा हुने जानकारी दिएका छन्।
उपसभापति स्वर्णिम वाग्ले पनि यस घटनामा प्रतिक्रिया दिएका छन्। उनले सभापति लामिछानेलाई अनावश्यक रूपमा हिरासतमा राखिएको आरोप लगाउँदै भने, "हामीले न्यायिक अनुसन्धानको विरोध गरेका छैनौं, तर यो स्पष्ट छ कि राज्यले राजनीतिक प्रतिशोधको रूपमा रविजीलाई हिरासतमा राखेको हो। हाम्रो आन्दोलन जारी रहनेछ र यसलाई अझै व्यापक बनाउने छौं।"
उपसभापति वाग्लेले भने, "हामी विधिको शासनमा आस्थावान छौं, तर यो कदम अति भयो। रविजी र रास्वपाप्रति सहानुभूति अझै बढेको छ। अब हामी ठोस योजना बनाएर अन्य साथीहरूलाई पनि यस आन्दोलनमा थप जोड्नेछौं।"
पार्टीका नेताहरूले आगामी दिनमा आफ्नो अभियानलाई अझ सशक्त र व्यापक बनाउन तयारी भइरहेको बताएका छन्।
