पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
आमा दर्शन न्युज :- संवाददाता
चितवन जिल्ला अदालतले सहकारी ठगी र संगठित अपराधको अभियोगमा राष्ट्रिय स्वतन्त्र पार्टीका सभापति तथा पूर्वगृहमन्त्री रवि लामिछानेसहित १० जनालाई पक्राउ गर्न अनुमति दिएको छ।
जिल्ला प्रहरी कार्यालय चितवनका प्रमुख एसपी गौतम मिश्रका अनुसार सहारा चितवन सहकारीका पीडितहरूले दिएको उजुरीका आधारमा शुक्रबार अदालतबाट पक्राउ पुर्जी जारी भएको हो। उजुरीमा लामिछाने र छविलाल जोशीसहित १० जना व्यक्तिमाथि सहकारी ठगीमा संलग्न रहेको आरोप लगाइएको छ।
पीडितहरूले सहारा चितवन सहकारीबाट १० करोड ८० लाख रुपैयाँभन्दा बढी रकम गोर्खा मिडिया नेटवर्क प्रालिमा गैरकानुनी रूपमा गाभिएको दाबी गरेका छन्। उक्त मिडियाका सञ्चालकहरू लामिछाने र जोशी रहेका थिए।
यसअघि लामिछाने कास्की प्रहरीको हिरासतमा छन्। उनीमाथि सोही मुद्दामा थप अनुसन्धान भइरहेको छ। चितवन प्रहरीले यस प्रकरणमा संगठित अपराधसमेतको अनुसन्धान गरिरहेको जनाएको छ।
यस घटनाले सहकारी क्षेत्रमा देखिएका अनियमितताहरूप्रति गम्भीर प्रश्न उठाएको छ। सरकारी निकायले यस्ता गतिविधिलाई नियमन र नियन्त्रण गर्न कडा कदम चाल्नुपर्ने आवाज उठ्न थालेको छ।
