रास्वपाले सातै प्रदेशमा इन्चार्ज तोक्यो, महाधिवेशनको मिति सारियो

राष्ट्रिय स्वतन्त्र पार्टी (रास्वपा) ले सातै प्रदेशमा संगठन सुदृढीकरणका लागि प्रदेश इन्चार्जहरू तोकेको छ। बिहीबार बसेको पार्टीको केन्द्रीय समिति बैठकले संगठन विस्तार र आगामी महाधिवेशनको तयारीका लागि इन्चार्ज नियुक्त गरेको हो।

पार्टीले तोकेको प्रदेश इन्चार्जहरूको विवरण यसप्रकार छ:

• कोशी प्रदेश – सन्तोष परियार

• मधेश प्रदेश – मनिष झा

• बागमती प्रदेश – लिमा अधिकारी

• गण्डकी प्रदेश – शिशिर खनाल

• लुम्बिनी प्रदेश – विपिन आचार्य

• कर्णाली प्रदेश – गणेश पराजुली

• सुदूरपश्चिम प्रदेश – हरि ढकाल

पार्टी स्रोतका अनुसार इन्चार्जहरूले प्रदेशस्तरीय संगठन निर्माण, कार्यकर्ता परिचालन र नीति कार्यक्रम कार्यान्वयनमा नेतृत्वदायी भूमिका निर्वाह गर्नेछन्।

यसैबीच, बैठकले राष्ट्रिय महाधिवेशनको मिति परिवर्तन गर्ने निर्णय समेत गरेको छ। पूर्वनिर्धारित मितिमा तयारी नपुगेपछि नयाँ मिति तय गर्ने निर्णय भएको र छिट्टै सार्वजनिक गरिने जनाइएको छ।

रास्वपाले हाल देशभरि संगठन विस्तारमा सक्रियता देखाउँदै आएको छ भने नीति निर्माणदेखि निर्वाचन तयारीसम्मको कार्यसूचीमा प्राथमिकता दिएको छ।