पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
आमा दर्शन न्युज :- संवाददाता
काठमाडौं, – संसद जनताको आवाज उठाउने सर्वोच्च थलो हो। तर, हालैको संसद अधिवेशनमा सांसदहरूले आफ्नो धारणा व्यक्त गर्न नपाएको भन्दै कडा आपत्ति जनाएका छन्। राष्ट्रिय स्वतन्त्र पार्टी (रास्वपा)का सांसदहरूले सभामुखको भूमिकाप्रति प्रश्न उठाउँदै संसदको कार्यशैलीमा गम्भीर असन्तोष जनाएका छन्।
रास्वपाका सांसदले आकस्मिक समय माग गर्दा सभामुखले पहिले बोल्न लागेको विषय बुझ्न खोज्ने, त्यसपछि अनुमतिको प्रक्रिया जटिल बनाउने, र अन्ततः बोल्ने अवसर नै रोक्ने प्रवृत्ति देखिएको आरोप लगाएका छन्। "संसद विचारको खुला मञ्च हो, तर सभामुखले यसलाई घेराबन्दी गर्न खोज्नु लोकतान्त्रिक प्रक्रियामै हस्तक्षेप हो," एक सांसदले भने।
गत अधिवेशनमा समितिको प्रतिवेदनमा संशोधन हालेर गलत नजिर बसाइएको विरोध गर्न खोज्दा समय नदिइएको भन्दै रास्वपाका सांसदहरू आक्रोशित बनेका छन्। पहिलो बैठकमै बोल्न नपाएपछि पार्टीका सबै सांसदहरू एकसाथ उठेका थिए, तर सभामुखले कुनै प्रतिक्रिया नदिएको उनीहरूको गुनासो छ।
यसको विरोधस्वरूप रास्वपाले १५ मिनेट संसद बहिष्कार गरेको थियो। तर, चौथो ठूलो दलले उठाएको विरोधलाई सभामुखले बेवास्ता गर्दै संसद सञ्चालन जारी राखेको भन्दै सांसदहरूले आक्रोश व्यक्त गरेका छन्।
"जब आवाजहरू दबाइन्छन्, ती प्रतिरोध बनेर अझ बुलन्द हुन्छन्। संसदलाई मौनताको सभा बनाउने प्रयास कुनै सभामुखको सफलता होइन, संसदीय प्रक्रियाकै हार हो," एक सांसदले भने।
यस विषयमा सभामुखको औपचारिक प्रतिक्रिया भने आएको छैन। तर, संसदमा अभिव्यक्तिको स्वतन्त्रता र विधायिकाको निष्पक्षता सुनिश्चित हुनुपर्ने माग बलियो हुँदै गएको छ।
(Aama Darshan News -
