पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
आमा दर्शन न्युज :- संवाददाता
भक्तपुरमा बाबु र छोराको हत्या प्रकरणमा मुख्य आरोपी ठानिएका जेठो छोरा मिलन आचार्यले प्रहरीमा आत्मसमर्पण गरेका छन्। खोटाङको दिक्तेल रूपाकोट मझुवागढी नगरपालिका–१ का ५६ वर्षीय कुलप्रसाद आचार्य र उनका २२ वर्षीय छोरा प्रवीण आचार्यको शव भक्तपुरस्थित डेरामा सोमबार बिहान भेटिएको थियो।
घटनापछि सम्पर्कविहीन रहेका मिलन मंगलबार काठमाडौंको महाराजगञ्जस्थित प्रहरी वृत्तमा पुगेका छन्। स्रोतका अनुसार उनले आफूलाई प्रहरीसमक्ष प्रस्तुत गर्दै आत्मसमर्पण गरेका हुन्।
प्रहरीले घटनास्थलमा प्रारम्भिक अनुसन्धानका क्रममा बाबु र भाइको शव छुट्टाछुट्टै कोठामा फेला पारेको थियो। घटनास्थलमा कुनै लुटपाट वा जबर्जस्तीको संकेत नपाइएकाले सुरुदेखि नै परिवारभित्रको विवादको कारण हुन सक्ने आशंका गरिएको थियो।
प्रहरीको प्रारम्भिक रिपोर्टअनुसार घटना शनिबार राति भएको अनुमान छ। तर, घटनामा जेठो छोराको संलग्नता र हत्याको उद्देश्यबारे थप अनुसन्धान भइरहेको छ।
महानगरीय प्रहरी परिसर भक्तपुरका प्रमुखका अनुसार मिलन आचार्यसँग सोधपुछ गर्ने प्रक्रिया सुरु भइसकेको छ। शव परीक्षणका लागि पठाइएको र घटनाको विस्तृत विवरण आउने क्रममा रहेको प्रहरीले जनाएको छ।
यस प्रकरणले स्थानिय क्षेत्र र सामाजिक सञ्जालमा चासो बढाएको छ। प्रहरीका अनुसार घटनाका सबै पक्षका बारेमा निष्पक्ष छानबिन गरिने र सत्य तथ्य सार्वजनिक गरिने छ।
