पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
आमा दर्शन न्युज :- संवाददाता
काठमाडौँ, – जापानको मात्सुमोतो नगरका प्रमुख योशिनाओ गानको नेतृत्वमा १९ सदस्यीय एक उच्चस्तरीय प्रतिनिधि मण्डलले काठमाडौँको अवलोकन भ्रमण गरेका छन्। यो भ्रमण काठमाडौँ महानगर र मात्सुमोतो नगर बीचको आपसी सम्बन्ध स्थापनाको ३५ औं वार्षिकोत्सवको अवसरमा भएको हो।
काठमाडौँ महानगरपालिकामा आयोजित एक स्वागत कार्यक्रममा नगर प्रमुख बालेन्द्र शाह (बालेन) र उपप्रमुख सुनिता डंगोलले मात्सुमोतो नगरका प्रमुख गान र उनका प्रतिनिधिहरूलाई सम्मानका साथ स्वागत गर्दै मायाको चिनो र काठमाडौँको चिनो 'देशे मरु झ्या:' प्रदान गरे। यस अवसरमा प्रमुख गानले दुई शहर बीचको ३५ वर्ष पुरानो मित्रता र सहकार्यलाई थप प्रगाढ बनाउने प्रतिबद्धता व्यक्त गरेका थिए।
भ्रमणका दौरान, काठमाडौँ र मात्सुमोतो नगरका अधिकारीहरूले आपसी समझदारी र नागरिक स्तरका विभिन्न कार्यक्रमहरूको विस्तारमा सहकार्य गर्ने विषयमा छलफल गरेका छन्। काठमाडौँ महानगरपालिकाका प्रमुख बालेन्द्र शाहले भन्नुभयो, "यो भ्रमण हाम्रो आपसी सम्बन्धलाई अझ बलियो बनाउन मद्दत पुर्याउनेछ, र हामीले भविष्यमा थप परियोजनाहरूमा मिलेर काम गर्ने अवसरहरूको खोजी गर्नेछौँ।"
मात्सुमोतो नगरको प्रतिनिधि मण्डलले काठमाडौँको ऐतिहासिक र सांस्कृतिक स्थलहरूको अवलोकन गर्दै, नगरको विकासका क्षेत्रहरूमा काठमाडौँसँग साझेदारी गर्न सकिने सम्भावनाहरूका बारेमा पनि चर्चा गरेका छन्।
यो भ्रमण काठमाडौँ र मात्सुमोतो नगरबीचको मित्रवत् सम्बन्धलाई नयाँ आयाम दिन र आपसी सहयोगका लागि थप अवसरहरू सिर्जना गर्न एक महत्वपूर्ण कदम मानिएको छ।
