पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
आमा दर्शन न्युज :- संवाददाता
काठमाडौँ महानगरपालिकाले लिङ्गका आधारमा हुने हिंसा न्यूनीकरणका लागि महिला सञ्जाल सञ्चालन कार्यविधि २०७९ कार्यान्वयनमा ल्याएको छ। हिंसा, शोषण, र दमनको शिकार भएका महिलाहरूलाई शीघ्र न्यायको पहुँचमा पुर्याउने उद्देश्यले महानगरका वडाहरूमा महिला सञ्जाल गठन गरिएको हो।
महानगरकी उपप्रमुख सुनिता डंगोलले हालै एक छलफल कार्यक्रममा बोल्दै महिला सञ्जालले आफ्नो भूमिकालाई थप प्रभावकारी बनाउन एकद्वार संकट व्यवस्थापन केन्द्रसँग सहकार्य गर्नुपर्नेमा जोड दिनुभयो। उहाँले भन्नुभयो, “सञ्जालले मेलमिलाप गराएका वा गराउन प्रयास गरेका तर मेलमिलाप नभएका फाइलहरू तत्काल केन्द्रमा पठाउनुपर्छ। वडामा फाइल अड्कियो भने पीडितलाई न्याय दिन ढिलाइ हुन्छ, जसले उनीहरूको पीडा थप्न सक्छ र पीडकलाई फाइदा पुग्न सक्छ।”
उपप्रमुख डंगोलले न्याय प्रक्रियालाई सहज र प्रभावकारी बनाउन सबैलाई आफ्नो प्रक्रिया र आचरणमा सुधार गर्नुपर्नेमा पनि जोड दिनुभयो। महिला सञ्जालमार्फत महानगरले हिंसाविरुद्ध जनचेतना फैलाउने, मेलमिलाप प्रक्रिया सहज बनाउने, र पीडितलाई कानूनी तथा मानसिक सहायताको पहुँचमा ल्याउने प्रयास गरिरहेको छ।
महिला सञ्जालले काठमाडौँ महानगरपालिकाका सबै वडाहरूमा आफ्नो सक्रियता बढाउँदै पीडित महिलाका समस्याहरूलाई सम्बोधन गर्न महत्त्वपूर्ण भूमिका खेलिरहेको छ। उपप्रमुख डंगोलका अनुसार, महिला सञ्जाल र संकट व्यवस्थापन केन्द्रबीच सहकार्यले पीडितलाई शीघ्र न्याय दिन र हिंसा न्यूनीकरणमा उल्लेखनीय सुधार ल्याउने अपेक्षा गरिएको छ।
